Toshkent, O‘zbekiston (UzDaily.uz) — Osaka shahrida o‘tayotgan Butunjahon ko‘rgazmasi EXPO 2025 doirasida Qozog‘iston milliy kuni munosabati bilan Qozog‘iston Respublikasi savdo va integratsiya vaziri Arman Shakkaliyev boshchiligidagi rasmiy delegatsiya O‘zbekiston Pavilyoniga tashrif buyurdi.

Yuqori martabali mehmon uchun maxsus ekskursiya tashkil etildi. Unda Arman Shakkaliyev Pavilyon konsepsiyasi va asosiy ekspozitsiya zonalari bilan tanishdi. U o‘zbek tomonini nufuzli xalqaro Red Dot mukofoti bilan tabriklab, puxta o‘ylangan konsepsiya tashrif buyuruvchilarga O‘zbekistonning tarixi, madaniyati va zamonaviy yutuqlarini chuqurroq anglash imkonini berishiga alohida urg‘u berdi.

Qozog‘iston vaziriga ayniqsa noyob harakatlanuvchi platforma, terrasaning arxitekturaviy yechimi va ekspozitsiya bilan interaktiv muloqot uchun ilg‘or NFC-texnologiyalaridan foydalanilishi katta taassurot qoldirdi.

Arman Shakkaliyev ko‘rgazma yakunlangach Pavilyonni Nukus shahrida qayta tiklash rejalarini alohida taʼkidlab, buni O‘zbekistonning barqaror rivojlanish tamoyillari va madaniy merosni asrab-avaylashga sodiqligining yorqin namunasi sifatida baholadi.

Tashrif yakunida vazir O‘zbekiston Pavilyonining Faxriy mehmonlar kitobiga yodgoriy yozuv qoldirdi.