Toshkent, O‘zbekiston (UzDaily.uz) — Qo‘shiqchi Shirin Abdullayeva 19 yoshida vafot etdi. Uning vafoti haqida Oila va xotin-qizlar masalalari qo‘mitasi maʼlum qildi.

Dastlabki maʼlumotlarga ko‘ra, fojianing sababi meningit bo‘lgan. U taxminan ikki oy komada bo‘lganidan so‘ng vafot etgan.

Shirin Abdullayeva 2005 yil 14 dekabr kuni Namanganda tug‘ilgan. Bolalikdan musiqaga bo‘lgan iqtidori bilan ajralib turgan, uch yoshidan qo‘shiq kuylashni boshlagan, mualliflik qo‘shiqlarini yozgan va respublika hamda xalqaro musiqiy tanlovlarda qatnashgan. Shuningdek, u kino industriyasida ham o‘zini sinab ko‘rgan.

2023 yilda Shirin sanʼat sohasida Zulfiya nomidagi Davlat mukofoti laureati bo‘lgan. Uning “Luli”, “Metro”, “Bezori” kabi qo‘shiqlari katta mashhurlikka erishib, YouTube platformasida millionlab ko‘rishlarga ega bo‘lgan.

2021 yilda u Rossiyaning NTV telekanalidagi «Ti — super!» musiqiy shousida qatnashib, yarim finalgacha yetgan.

Vafoti vaqtida Shirin Pekindagi nufuzli Sinxua universiteti talabasi edi.

U Namanganlik mashhur tadbirkor, BA Holding asoschisi Bahodir Abdullayevning kenja qizi edi.