Toshkent, O‘zbekiston (UzDaily.uz) — Qirg‘iziston Respublikasi Vazirlar Mahkamasi O‘zbekiston tomonidan rasman topshirilgan ikki yirik yer uchastkasini davlat mulkiga qabul qilish to‘g‘risida qaror qabul qildi. Bu haqda 24.kg axborot agentligi xabar berdi.

Gap O‘sh viloyatida joylashgan hududlar haqida bormoqda: jumladan, Qara-Suy tumanidagi №312/4 va №312/6 nazorat-o‘tkazish punktlari orasida joylashgan 100 gektarlik, shuningdek, Aravon tumanidagi №324 va №328 punktlar orasidagi 198,44 gektarlik yer uchastkalari haqida. Bu yerlar Qirg‘iziston va O‘zbekiston o‘rtasidagi davlat chegarasining ayrim uchastkalarini belgilash to‘g‘risidagi kelishuvga muvofiq ravishda, rasmiy tarzda topshirilgan.

Ushbu kelishuv 2022 yil 3 noyabr kuni Bishkek shahrida har ikki davlat prezidentlari tomonidan imzolangan «Qirg‘iziston Respublikasi va O‘zbekiston Respublikasi o‘rtasidagi davlat chegarasining ayrim uchastkalari to‘g‘risidagi kelishuv» qonuniga muvofiq amalga oshirilgan.

Kelishuvga ko‘ra, ikki davlat o‘rtasida umumiy uzunligi 302,29 kilometrni tashkil etuvchi chegara chizig‘i belgilab olingan bo‘lib, u 35 ta bahsli hududni qamrab olgan.

Hukumat qaroriga asosan, Qara-Suy va Aravon tuman hokimliklari ushbu yerlarni tegishlicha Qara-Suu va Kerme-Too ayil okruglariga bepul foydalanish uchun topshirishi lozim. Yerlardan maqsadli foydalanish ustidan nazorat mahalliy hokimiyatlarga yuklatilgan. Mulkni rasmiylashtirish ishlari mahalliy byudjet hisobidan amalga oshiriladi.

Kelasi bir oy ichida yer uchastkalarining inventarizatsiyasi va davlat ro‘yxatidan o‘tkazilishi rejalashtirilgan. Bu ishlar Yer resurslari, kadastr, geodeziya va kartografiya bo‘yicha davlat agentligi hamda O‘sh viloyatidagi Prezidentning vakili hamkorligida olib boriladi.

Avvalroq xabar berilishicha, mazkur kelishuv doirasida O‘zbekiston chegara hududlarida yashab kelayotgan taxminan 130 ta oila uchun kompensatsiya sifatida 50 milliard so‘m (taqriban 4,5 million dollar) ajratadi.

Shuningdek, O‘zbekiston va Qirg‘iziston Kempir-Obod suv omborini birgalikda boshqarish bo‘yicha qo‘shma korxona tuzishga kelishib olgan. Bu kelishuv suv resurslarini birgalikda boshqarishga qaratilgan keng qamrovli hamkorlikning bir qismi hisoblanadi.

Territoriya almashinuvi doirasida O‘zbekistonga Andijon suv ombori hududida 4957 gektar yer va gidrotexnik inshootni taʼminlash hamda muhofaza qilish uchun qo‘shimcha 19,5 gektar yer o‘tadi. Kompensatsiya sifatida Qirg‘iziston 1019 gektar yaylov yerlari, shuningdek, “Govasay” hududidan 12 849 gektar yerni oladi — bu Kempirobod kanali qurilishidan voz kechish evaziga beriladi.