Toshkent, O‘zbekiston (UzDaily.uz) — Ijtimoiy tarmoqlarda Sharaf-Rashidov tumani hokimi hibsga olinganidan so‘ng, go‘yoki uning nomidan pul mablag‘larini ajratish to‘g‘risida beshta qaror imzolangani haqida xabarlar tarqalmoqda.

Ushbu holat yuzasidan Sharaf-Rashidov tumani prokuraturasi tomonidan dastlabki tergovga qadar tekshiruv o‘tkazilishi boshlandi. Jizzax viloyati prokuraturasi esa to‘plangan materiallar asosida qonuniy protsessual qaror qabul qilish jarayonini nazoratga oldi.

Eslatib o‘tamiz, avvalroq Davlat xavfsizlik xizmati Jizzax viloyatining Sharaf-Rashidov tumani hokimi Mahmud Xolbutayev qo‘lga olingani haqida xabar bergan edi.

Unga nisbatan O‘zbekiston Respublikasi Jinoyat kodeksining 210-moddasi — «Pora olish» bo‘yicha jinoyat ishi qo‘zg‘atilgan. Shuningdek, u deputatlik daxlsizligidan ham mahrum qilindi.

Bundan tashqari, mazkur ish doirasida tuman hokimligi bosh mutaxassisiga nisbatan Jinoyat kodeksining 168-moddasi (“Firibgarlik”) va 211-moddasi («Pora berish») bo‘yicha ham jinoyat ishi qo‘zg‘atilgan.