Toshkent, O‘zbekiston (UzDaily.uz) — Nemis ishbilarmonlari bilan Farg‘onada istiqbolli loyihalar amalga oshiriladi Viloyat hokimi Xayrullo Bozorovning Berlin shahrida olib borayotgan uchrashuvlari davomida Germaniyalik tadbirkorlarning Farg‘ona viloyatida biznes yuritishga bo‘lgan qiziqishi ortib bormoqda.

Bir qator istiqbolli loyihalar bo‘yicha amaliy kelishuvlarga erishilgani bunga yaqqol misoldir. Xususan, “Waltec Maschinenbau” kompaniyasi rahbari Peter Rayx bilan Farg‘onada yuqori sifatli shisha mahsulotlari ishlab chiqarish bo‘yicha muzokaralar o‘tkazildi. “

Waltec Maschinenbau” — Germaniyaning mashhur avtomatlashtirilgan shisha ishlab chiqarish texnologiyalari bo‘yicha uskuna va liniyalar yaratuvchi kompaniyasi hisoblanadi. U 50 dan ortiq mamlakatda amalga oshirilgan loyihalar va ishonchli hamkorlik tajribasiga ega.

Uchrashuv yakunida joriy yil iyul oyi oxirida kompaniya vakillari Farg‘onaga tashrif buyurib, loyiha bo‘yicha zarur hujjatlarni rasmiylashtirishni boshlashga kelishib olindi.

Shuningdek, “Munich Carpet Manufactory” kompaniyasi rahbari Martin Grebener bilan bo‘lib o‘tgan muzokarada gilamchilik yo‘nalishida hamkorlik istiqbollari muhokama qilindi.

Suhbatda Farg‘onada milliy hunarmandchilik, ayniqsa, qo‘lda to‘qilgan ipak gilamlari keng tarqalgani va mashhur ekanligi taʼkidlandi. Zamonaviy texnologiya va dizayn asosida Yevropa bozorida o‘z o‘rniga ega bo‘ladigan gilam mahsulotlari ishlab chiqarish loyihasini amalga oshirish bo‘yicha kelishuvga erishildi.