Toshkent, O‘zbekiston (UzDaily.uz) — O‘zbekistonning Pokistondagi elchisi Alisher To‘xtayev Pokiston Charm ishlab chiqaruvchilari assotsiatsiyasi (PTA) vakillari ishtirokida bo‘lib o‘tgan biznes-forumda ishtirok etdi, deb xabar beradi «Dunyo» axborot agentligi.

Forumda charm qayta ishlash va charm mahsulotlari (kiyim-kechak, poyabzal, qo‘lqoplar va boshqalar) ishlab chiqarish sohasida qo‘shma loyihalar istiqbollari muhokama qilindi. Elchi ushbu tarmoqning o‘zaro savdoni kengaytirishda katta salohiyati borligini ta’kidladi.

PTA a’zolari o‘zbekistonlik tashkilotlar bilan hamkorlik qilishga, tajriba almashishga va ishlab chiqarish quvvatlarining bir qismini O‘zbekistonga ko‘chirishga tayyor ekanliklarini bildirdi. Pokistonliklarga 2025-yilning ikkinchi choragida O‘zbekistonga tashrif buyurib, aniq loyihalarni muhokama qilish taklifi berildi.

PTA prezidenti Hamid Arshad Zaxur va vitse-prezident Donish Amon hamkorlikni rivojlantirish uchun xalqaro ko‘rgazmalarda ishtirok etish muhimligini qayd etdilar.

Pokiston vakillari «O‘zcharmsanoat»ni 2025-yilning 26–28-yanvar kunlari Lohurda o‘tkaziladigan «Pakistan Mega Leather Show» ko‘rgazmasiga taklif qildi.