Toshkent, O‘zbekiston (UzDaily.uz) — 2025 yil 2 iyuldan boshlab, yillik daromadi 100 million so‘mdan oshgan o‘zini o‘zi band qilgan shaxslar — yengil avtomobillarda yo‘lovchi tashish va buyurtma asosida tovar yetkazib berish faoliyati bilan shug‘ullanuvchilar uchun soliqlar to‘lov manbaida, yaʼni agregatorlar (soliq agentlari) tomonidan ushlab qolinadi. Bu jarayon Davlat soliq xizmati organlari tomonidan yuboriladigan xabardornoma asosida amalga oshiriladi.

2025 yil 1 iyul holatiga ko‘ra, O‘zbekistonda yengil avtomobillarda yo‘lovchi tashish va tovar yetkazib berish faoliyati bilan shug‘ullanuvchi 776,7 ming nafar o‘zini o‘zi band qilgan fuqaro ro‘yxatdan o‘tgan.

Mamlakatda 208 ta yuridik shaxs — onlayn taksi agregatorlari faoliyat yuritmoqda. Ular mijoz topish uchun interaktiv xizmatlar taqdim etib, soliq organlarining axborot tizimlari bilan to‘liq integratsiya qilingan.

Aynan shu agregatorlar orqali 430 mingdan ortiq o‘zini o‘zi band qilgan haydovchi yo‘lovchi tashish xizmatlarini ko‘rsatmoqda. Ushbu faoliyatdan tushgan umumiy soliq tushumlari 89,6 milliard so‘mni tashkil etgan.

2025 yil 2 iyuldan eʼtiboran yangi soliq to‘lash tartibi kuchga kiradi: agar o‘zini o‘zi band qilgan shaxsning yillik daromadi 100 million so‘mdan oshsa, soliq summasi to‘g‘ridan-to‘g‘ri to‘lov manbaida — agregator tomonidan ushlab qolinadi. Bu funksiya agregatorlar tomonidan, Davlat soliq xizmati organlari xabardornomasiga asosan amalga oshiriladi.

Maʼlumot o‘rnida: joriy yil boshidan beri 189 nafar o‘zini o‘zi band qilgan haydovchi 100 million so‘mlik yillik daromad porogini oshirgan.

Yangi tizim o‘zini o‘zi band qilgan shaxslarga soliqlarni mustaqil hisoblash, to‘lash va hisobot taqdim etish bilan bog‘liq ortiqcha byurokratik yuklamalardan xalos bo‘lish imkonini beradi.

Bu tizimni amaliy joriy etgan birinchi kompaniya — Yandex Uzbekistan bo‘ldi. U o‘z platformasida faoliyat yurituvchi haydovchi va kuryerlar uchun avtomatlashtirilgan soliq to‘lash mexanizmlarini joriy etdi.