Toshkent, O‘zbekiston (UzDaily.uz) — O'zbekiston Prezidentining S gepatiti kasalligini 100 foiz davolash bo'yicha" tashabbusi ijrosi doirasida 14-dekabr kuni "Uzbekistan Airways" aviakompaniyasi Misr hukumati tomonidan mamlakatimizga insonparvarlik yordami sifatida ajratilgan "S" gepatitiga qarshi "Sofosbuvir-400mg" dori vositasini Sharm ash-Shayxdan Toshkentga yetkazish jarayonini qayta yo'lga qo'ydi, deb xabar qilmoqda "Dunyo" AA muxbiri.

Ushbu sakkizinchi partiyadagi yordam umumiy 30 dona qutilarda 7200 dona "Sofosbuvir-400mg" dori vositalarini o'z ichiga oladi.

Dori vositalari O'zbekiston Sog'liqni saqlash vazirligi huzuridagi Virusologiya ilmiy-tekshirish instituti tomonidan shifotalab bemorlarga taqsimlanadi.

O'zbekiston elchixonasi xabariga ko'ra, Misr hukumati tomonidan umumiy qiymati 4,2 million AQSH dolariga teng bo'lgan jami 800 ming dona (40 tonnaga yaqin) S gepatitiga qarshi "Daklatasvir" va "Sofosbuvir", V gepatitiga qarshi "Entekavir" dori vositalarining beg'araz grant yordam sifatida O'zbekistonga berilishi bo'yicha kelishuvga erishilgan.

Hozirga qadar vazni 13,4 tonna, umumiy qiymati 1461 ming dollarga teng bo'lgan mazkur dori vositalari mamlakatimizga bosqichma-bosqich yuborildi.