Toshkent, O‘zbekiston (UzDaily.uz) — Ekologiya, atrof-muhitni muhofaza qilish va iqlim o‘zgarishi vaziri Aziz Abduhakimov «O‘zbekiston 24» telekanaliga bergan intervyusida Prezident huzurida o‘tgan yig‘ilishda alohida eʼtibor talab qiladigan 15 ta asosiy turdagi chiqindilar aniqlanganini maʼlum qildi.

Ular orasida farmatsevtika va tibbiy chiqindilar, organik qoldiqlar, shuningdek, zaharli va radioaktiv ifloslantiruvchilar bor.

Vazirning so‘zlariga ko‘ra, barcha toifalar hududlar bo‘yicha taqsimlanib, tajriba tariqasida ularni utillash va qayta ishlash texnologiyalari joriy etiladi. Xususan, Toshkentda qurilish chiqindilarini qayta ishlash uchun 270 million dollar, Samarqand viloyatida esa elektron chiqindilarni qayta ishlash uchun taxminan 18,5 million dollar investitsiya jalb qilish rejalashtirilgan. Keyinchalik ushbu tajriba butun mamlakat bo‘ylab joriy etiladi.

Tumanlar miqyosida har bir viloyatda bitta tuman zamonaviy chiqindi yig‘ish va olib chiqish tizimini joriy etadi. Buning uchun zamonaviy kichik o‘lchamli transport vositalari, jumladan, elektroskuterlar ishlatiladi, ular chiqindilarni sortirovka va qayta ishlash uchun qayta yuklash stansiyalariga yetkazib beradi.

Vazir chiqindilarni qayta ishlash ish o‘rinlari yaratish bo‘yicha yuqori salohiyatga ega foydali iqtisodiy sohalardan biriga aylanayotganini taʼkidladi. Har bir mahallada organik chiqindilardan o‘g‘it va biogaz ishlab chiqarish, biogazdan esa elektr energiyasi olish yo‘lga qo‘yiladi.

Chiqindilarni boshqarish agentligi direktori Sharifbek Hasanovning taʼkidlashicha, prezident olis hududlarda kompost qayta ishlash zavodlarini qurishga rozilik bergan. Bu korxonalar kanalizatsiya chiqindilarini gaz va qishloq xo‘jaligi uchun o‘g‘itga aylantiradi.

Uning aytishicha, chiqindi chuqurlaridan chiqindilar markazlashgan holda bunday obyektlarga olib boriladi, u yerda avval gaz ajratib olinadi, keyin zararsiz qoldiqlar o‘g‘it sifatida ishlatiladi.