Toshkent, O‘zbekiston (UzDaily.uz) — «O‘zbekiston temir yo‘llari» kompaniyasi mamlakat ichidagi temir yo‘l yuk tashish xizmatlari bo‘yicha tariflarni oshirmoqda.

Yangi shartlarga ko‘ra, 2025-yil 15-yanvardan boshlab umumiy foydalanuvdagi yo‘llar (infratuzilma) va lokomotivlardan foydalanish tariflari uchun koeffitsiyentlar o‘zgarmoqda. Ushbu koeffitsiyentlar 10−01 narxnoma asosida belgilab berilgan.

Yangi koeffitsiyentlar:

«Toshguzar — Boysun — Qumqo‘rg‘on» yo‘nalishi uchun — 0,814;

«Angren — Pop» yo‘nalishi uchun — 0,921;

Ikkala yo‘nalishni ham o‘z ichiga olgan marshrutlar uchun — 0,921;

Ushbu yo‘nalishlarni o‘z ichiga olmaydigan marshrutlar uchun — 0,774.

Tariflarning ilgari oshirilishi 2023-yil oktyabr oyida amalga oshirilgan edi. Shuningdek, shu yil noyabr oyida kompaniya ichki yuk tashish uchun inventar vagonlar taqdim etish tariflarini 30% ga oshirishini e’lon qilgan edi.

«Temir yo‘l transporti to‘g‘risida»gi qonunning yangi tahririda yuk tashish sohasida bozor mexanizmlari asosida narx belgilash tizimi joriy etilishi ko‘zda tutilgan. Unga ko‘ra, ichki tashishlarga chegirmalar bekor qilinadi. Shu bilan birga, bunday chegirmalar berish imkoniyati Vazirlar Mahkamasining alohida qarori bilan belgilanishi mumkin.