Toshkent, O‘zbekiston (UzDaily.uz) — O‘zbekistonda pullik davlat xizmatlari yaqin orada bank va moliyaviy ilovalar orqali ham taqdim etiladi. Bu haqda raqamli texnologiyalar vaziri Sherzod Shermatov “O‘zbekiston 24” telekanaliga bergan intervyusida maʼlum qildi.

Vazirning so‘zlariga ko‘ra, asosiy maqsad — davlat xizmatlarini faqat rasmiy platformalarda emas, balki foydalanuvchilarga tanish va qulay interfeysga ega bank ilovalari orqali ham taqdim etishdir. U eslatib o‘tdiki, o‘tgan yili test tartibida bepul xizmatlarni bank ilovalari orqali berish amaliyoti sinab ko‘rilgan va endi prezident topshirig‘iga ko‘ra, ular orqali pullik xizmatlar ham ko‘rsatilishi mumkin bo‘ladi.

«Foydalanuvchilar allaqachon ushbu ilovalar interfeysiga moslashgan. Shu bois, ular uchun pullik davlat xizmatlarini ham shu platformalarda olish qulayroq bo‘ladi», — deya taʼkidladi Shermatov.

Shuningdek, vazir maʼlum qilishicha, prezident topshirig‘iga binoan barcha onlayn davlat xizmatlari yagona My.gov.uz portaliga integratsiya qilinishi lozim. Shu bilan birga, barcha darajadagi davlat xizmatlarining kamida 70 foizi raqamli formatda ushbu portal orqali taqdim etilishi kerak.

Biroq Shermatovga ko‘ra, bu maqsadga erishish uchun davlat organlarining o‘zi ichki jarayonlarni raqamlashtirish va zamonaviy axborot tizimlarini joriy etish bo‘yicha faol ish olib borishi talab etiladi.