Toshkent, O‘zbekiston (UzDaily.uz) — Sputnik multimediali matbuot markazida «O‘zbekistonda mavsumiy hasharotlar hujumiga qarshi qanday kurashilmoqda?» mavzusida matbuot anjumani bo‘lib o‘tdi.

O‘zbekiston Respublikasi Qishloq xo‘jaligi vazirligi huzuridagi Karantin va o‘simliklar himoyasi agentligi vakillari hosildorlikni saqlab qolish bo‘yicha ko‘rilgan choralar, himoya qilingan qishloq xo‘jaligi yerlari va xalqaro hamkorlik natijalari haqida maʼlumot berdilar.

Taʼkidlanishicha, saranchalarga qarshi kurashishning faol davri mart oyidan avgustgacha bo‘lib, bu davrda aholi tomonidan sarancha to‘planishi to‘g‘risida xabar berish uchun 12-88 va 71-202-10-00 raqamlari orqali doimiy ravishda ishlovchi «ishonch telefoni» xizmati faoliyat yuritadi.

Agentlik matbuot kotibi Sabina Sadinovaning aytishicha, mamlakatda mavsumiy zararkunandalarga qarshi samarali kurashishda muhim ahamiyatga ega bo‘lgan avtomatlashtirilgan monitoring tizimi joriy etilgan.

Tadbir davomida xalqaro hamkorlikning ahamiyati ham alohida qayd etildi. Xususan, O‘zbekiston o‘simliklar karantini va himoyasi sohasida Rossiya bilan yaqin hamkorlik qilayotgani aytildi. Mutaxassislar feromon tuzoqlarini birgalikda ishlab chiqmoqda, shuningdek, PSR-laboratoriyalar joriy etilmoqda.

2024 yilda O‘zbekiston Rossiyaga 2 million tonnaga yaqin meva-sabzavot mahsulotlari eksport qilgan bo‘lib, shundan chorak qismi aynan Rossiya bozoriga to‘g‘ri keladi. Shu bilan birga, mahsulot turlarini kengaytirish, eksport hajmini oshirish va mutaxassislarni tayyorlash bo‘yicha ishlar davom etmoqda.