Toshkent, O‘zbekiston (UzDaily.uz) — Bandlik va kambag‘allikni qisqartirish vazirligi maʼlumotiga ko‘ra, 2025 yilning birinchi yarim yilligi yakunlari bo‘yicha O‘zbekistonda ishsizlik darajasi 5,1 foizni tashkil etdi. Bu o‘tgan yilning shu davriga nisbatan 0,4 foiz punktga kamayganini ko‘rsatadi.

Mamlakatning mehnat resurslari 20,3 million kishini tashkil etadi. Shundan 15,4 million kishi iqtisodiy faol aholiga, 4,9 million kishi esa iqtisodiy nofaol aholiga to‘g‘ri keladi. Iqtisodiy faol aholi orasida 14,6 million kishi ish bilan band, 781,6 ming kishi esa ishsiz sifatida ro‘yxatga olingan.

Vazirlik maʼlumotlariga ko‘ra, rasmiy ishga joylashganlar soni qariyb 8 million kishini yoki 55 foizni tashkil etadi. Bu ko‘rsatkich 2024 yilning birinchi yarim yilligiga nisbatan 19 foizga ko‘pdir.

Shu bilan birga, 4,8 million kishi (33 foiz) norasmiy ishlab kelmoqda, bu o‘tgan yilga nisbatan 13,6 foizga kam. 1,8 million kishi (12 foiz) esa xorijda mehnat qilmoqda.

Iqtisodiy nofaol aholi ichida 2 million kishi (41 foiz) taʼlim olayotgan bo‘lsa, 2,2 million kishi (44 foiz) ikki yoshgacha bola parvarishi taʼtilida.

Yana taxminan 0,8 million kishi ishlashni istamaydi yoki ish topish imkoniyatiga ega emas.