Toshkent, O‘zbekiston (UzDaily.uz) — O‘zbekiston Adliya vazirligi elektron tijorat sohasida kuryerlik xizmatlari faoliyatini tartibga soluvchi yangi nizomni ro‘yxatdan o‘tkazdi. Bu haqda vazirlikning huquqiy axborot kanalida maʼlum qilindi.

Ushbu hujjat Istiqbolli loyihalar milliy agentligi tomonidan ishlab chiqilgan bo‘lib, ilk bor kuryerlarning huquqiy maqomi, huquq va majburiyatlarini aniq belgilab beradi.

Nizomga ko‘ra, kuryerlar — bu tadbirkorlar yoki yetkazib berish xizmatlari bilan mehnat shartnomasi yoki fuqarolik-huquqiy shartnoma asosida tovarlar yetkazib berish bilan shug‘ullanuvchi shaxslar hisoblanadi. Shuningdek, elektron tijorat xizmatlari bilan to‘g‘ridan-to‘g‘ri hamkorlik qiluvchi o‘zini o‘zi band qilgan shaxslar ham ushbu toifaga kiradi.

Hujjatning muhim jihatlaridan biri — yetkazib berish xizmatlari va kuryerlarga, shartnomada belgilangan bo‘lsa, tovarlar yoki/va yetkazib berish xizmati uchun to‘lovni xaridordan qabul qilish huquqining berilishi hisoblanadi. Biroq bu jarayonda kassa texnikasidan foydalanish majburiy bo‘lib, qog‘oz yoki elektron chek yoxud kvitansiya berilishi talab etiladi.

Aynan oziq-ovqat mahsulotlari yetkazib berilishida sanitariya normalariga alohida eʼtibor qaratiladi. Dostavkaga jalb etilgan avtomashinalar va termokonteynerlar tozaligi taʼminlangan va texnik jihatdan sog‘lom holatda bo‘lishi kerak. Kuryerlar va kuryerlik xizmatlari foydalanilayotgan uskunalarni muntazam yuvish va dezinfeksiya qilish majburiyatiga ega.

Xavfsizlik va maxfiylikni taʼminlash maqsadida, kuryerlarga yetkazilayotgan tovarlarning qoplamasini ochish qatʼiyan taqiqlanadi. Shuningdek, xaridorlarning shaxsiy maʼlumotlari va yetkazib berishga oid maʼlumotlarni, qonun hujjatlarida belgilangan holatlardan tashqari, uchinchi shaxslarga berish mumkin emas.

Ushbu nizomning joriy etilishi O‘zbekistonda jadal rivojlanayotgan onlayn savdo fonida elektron tijoratga bo‘lgan ishonchni oshirish, kuryerlar faoliyati uchun yagona standartlarni joriy etish va isteʼmolchilar huquqlarini himoya qilishni kuchaytirishga qaratilgan.