Toshkent, O‘zbekiston (UzDaily.uz) — Samarqand viloyatining Jomboy tumanida avtobus ishtirokida yo‘l-transport hodisasi sodir bo‘ldi. Natijada 23 ta ayol jarohatlandi, shulardan biri vafot etdi, deb xabar beradi Millar telekanali tuman shifoxonasi bosh shifokori Tozagul Xoliqovaga tayangan holda.

Hodisa 11 fevral kuni sodir bo‘lgan. Yo‘l harakati xavfsizligi boshqarmasi maʼlumotiga ko‘ra, hodisa joyida 68 yoshli erkak halok bo‘lgan. Biroq, uning avtobusda bo‘lgani yoki boshqa transport vositasida bo‘lgani aniq aytilmagan.

Tuman shifoxonasi bosh shifokori maʼlum qilishicha, shifoxonaga 23 ta ayol yetkazilgan, ularning ko‘pchiligida og‘ir jarohatlar mavjud. 16 nafar yo‘lovchi jarrohlik bo‘limiga yotqizilgan, ikki nafari reanimatsiyada, ularning holati og‘ir deb baholanmoqda.

Samarqand viloyati Transport boshqarmasi hodisa va bir insonning halok bo‘lganini tasdiqladi, biroq qo‘shimcha maʼlumotlar oshkor qilinmadi.