Toshkent, O‘zbekiston (UzDaily.uz) — 2024-yilda O‘zbekiston iqtisodiyotiga to‘g‘ridan to‘g‘ri chet el investitsiyalari (TTCHI) 50% dan ziyod oshdi. Bu haqda Markaziy bank ma’lumotlarida qayd etilgan.

O‘tgan yilning yanvar-dekabr oylari davomida asosiy kapitalga kiritilgan investitsiyalar 27,6% ga o‘sdi.

O‘sishning asosiy qismi markazlashtirilmagan investitsiyalarga to‘g‘ri kelib, ular 32,8% ga ko‘paydi. Bu investitsiyalarning umumiy hajmdagi ulushi 90% dan oshib, 3 foizlik punktga o‘sganini ko‘rsatdi.

Shu bilan birga, yilning to‘rtinchi choragi yakuniga ko‘ra markazlashtirilgan investitsiyalar salbiy dinamikani ko‘rsatib, 4,2% ga pasaydi.

O‘zbekiston iqtisodiyotiga to‘g‘ridan to‘g‘ri chet el investitsiyalari hajmi 53,6% ga o‘sib, 11,9 milliard AQSH dollariga yetdi. Ular mamlakat yalpi ichki mahsulotidagi (YAIM) ulushini 2,4 foizlik punktga oshirib, 10,3% ni tashkil qildi.

Agar yanvar-sentyabr oylarida TTCHIning har chorakdagi hajmi taxminan 2,7 milliard dollarni tashkil etgan bo‘lsa, 2024-yilning so‘nggi choragida bu ko‘rsatkich rekord darajaga — 3,87 milliard dollarga yetdi. Bu 2021-yildan beri kuzatilgan eng yuqori ko‘rsatkich bo‘lib, 2023-yilning oxirida qayd etilgan oldingi rekordni ($3,41 milliard) ortda qoldirdi.

Bundan tashqari, 2024-yilda xalqaro pul o‘tkazmalari hajmi 30% ga o‘sib, 14,8 milliard dollarga yetdi. Markaziy bank ma’lumotlariga ko‘ra, rossiya rublining yuqori o‘zgaruvchanligi yil oxirida xalqaro pul o‘tkazmalarining sekinlashishiga ta’sir ko‘rsatgan.

Shuningdek, aholi tomonidan xorijiy valyutani sotib olish va sotish o‘rtasidagi farq ikki baravar oshib, 6,7 milliard dollarga yetgani qayd etildi.