Toshkent, O‘zbekiston (UzDaily.uz) — O‘zbekistonda 2025 yil oxiriga qadar Ai-80 benzinidan foydalanish va uni sotishni cheklash rejalashtirilmoqda. Bu bilan aholini «sifatli, ekologik toza va arzon yoqilg‘i» bilan taʼminlash ko‘zda tutilgan.

Mazkur choralar 30 yanvar kuni Prezident farmoni bilan tasdiqlangan “O‘zbekiston-2030” Strategiyasini amalga oshirish bo‘yicha Davlat dasturi doirasida qabul qilingan.

Shuningdek, yil oxiriga qadar respublikaning barcha hududlarida issiqlik va elektr energiyasi ishlab chiqaruvchi korxonalarda mazutdan yoqilg‘i sifatida foydalanish to‘liq taqiqlanadi.

Mazutdan istisno sifatida avariya holatlarida mumkin bo‘ladi. Bu holatlar Vazirlar Mahkamasi bilan kelishilishi hamda Ekologiya, atrof-muhitni muhofaza qilish va iqlim o‘zgarishi vazirligiga xabar berilishi lozim.