Toshkent, O‘zbekiston (UzDaily.uz) — 2024-yilda O‘zbekistonda 9364 ta yo‘l-transport hodisasi qayd etildi, shundan 3045 tasi (yoki 32,5%) yuk va yo‘lovchi tashish bilan shug‘ullanuvchi transport vositalari ishtirokida sodir bo‘ldi. Bu haqda Oliy Majlis Qonunchilik palatasi yig‘ilishida transport vaziri Ilhom Mahkamov ma’lum qildi.

Yuk va yo‘lovchi transporti ishtirokidagi barcha YTH orasida eng ko‘p hodisa keng ommaviy transport sifatida foydalaniladigan Damas mikrovenlari bilan bog‘liq bo‘ldi. Ularning ulushi 52,3% ni tashkil etib, 1592 ta holatni o‘z ichiga oladi. Keyingi o‘rinlarda yuk avtomobillari — 558 ta hodisa (18,3%), avtobuslar — 137 ta (4,5%) va mikroavtobuslar — 29 ta holat (0,95%) qayd etilgan.

Hisobotda alohida e’tibor haydovchilarning uyquchanligiga qaratildi. Mehnat va dam olish rejimiga rioya qilinmagani oqibatida haydovchilarning rulda uxlab qolishi sababli 351 ta YTH sodir bo‘lib, bu jami hodisalarning 3,7% ini tashkil etdi. Ushbu avariyalarda 189 kishi halok bo‘lib, 285 kishi jarohatlandi.

Rulda uyquga ketish butun dunyo bo‘ylab eng keng tarqalgan yo‘l-transport hodisalari sabablaridan biri bo‘lib qolmoqda. Mutaxassislar haydovchilarga, ayniqsa uzoq masofaga safar qilayotganda, dam olish tartibiga qat’iy rioya qilishni tavsiya etadi, chunki bu fojiali oqibatlarning oldini olishga yordam beradi.

Avval e’lon qilingan ma’lumotlarga ko‘ra, 2024-yilda sodir bo‘lgan barcha YTH natijasida 8901 kishi jarohatlangan, 2203 kishi esa hayotdan ko‘z yumgan. 2024-yilda avariyalarda jabrlangan va halok bo‘lgan bolalar haqidagi ma’lumotlar aniqlashtirilmagan, ammo 2023-yilda 1794 ta bola ishtirok etgan YTH sodir bo‘lib, 1568 bola jarohatlangan, 263 nafari esa vafot etgan. 2022-yilda esa 10 oy ichida avariyalarda 226 bola halok bo‘lgan, biroq butun yil bo‘yicha aniq raqamlar e’lon qilinmagan.