Toshkent, O‘zbekiston (UzDaily.uz) — O‘zbekiston Hukumati Ozarbayjonning Davlat neft kompaniyasi (SOCAR) bilan mahsulotni bo‘lishish to‘g‘risidagi bitim (MBB)ni imzolashga tayyorlanmoqda. Bu haqda energetika vaziri Jurabek Mirzamahmudov 21 iyul kuni mamlakat Prezidenti rahbarligida o‘tkazilgan yig‘ilish yakunlari haqida «O‘zbekiston 24» telekanaliga bergan intervyusida maʼlum qildi.

Yig‘ilish chog‘ida Prezident Shavkat Mirziyoyev xalqaro hamkorlar bilan neft-gaz sohasida amalga oshirilayotgan qo‘shma loyihalar yuzasidan taqdimot bilan tanishdi. Ularning asosiy yo‘nalishlaridan biri SOCAR kompaniyasi bilan Ustyurt mintaqasida uglevodorodlar qazib chiqarish va razvedka ishlarini yo‘lga qo‘yish bo‘ldi.

Tomonlar istiqbolli uchastkalarda qo‘shma geologiya-qidiruv ishlarini olib borish hamda mahsulotni bo‘lishish to‘g‘risidagi bitim tuzish yuzasidan kelishuvga erishishdi. Vazirning taʼkidlashicha, ushbu bitim bo‘yicha zarur hujjatlar paketi tayyorgarligining yakuniy bosqichiga yetib kelgan. SOCAR bilan MBBni imzolash shu hafta oxiriga rejalashtirilgan.

Prezident Mirziyoyev erishilgan kelishuvlarni jadal amalga oshirish, 2025 yil oxirigacha va keyingi yillar uchun bosqichma-bosqich harakatlar rejasini ishlab chiqish hamda xorijiy hamkorlar bilan hamkorlikda ortiqcha byurokratik to‘siqlarni bartaraf etish bo‘yicha topshiriq berdi.

“O‘zbekneftgaz” kompaniyasi bosh direktori Bahodir Sidiqov bitim loyihasi tayyorlanganini, uning asosiy qoidalari SOCAR bilan kelishilganini va Prezident ko‘rib chiqishi uchun taqdim etilganini tasdiqladi. Uning so‘zlariga ko‘ra, Ozarbayjon tomoni bilan MBB imzolanishi O‘zbekistonning neft-gaz sohasini yana-da rivojlantirish uchun yangi istiqbollarni ochib beradigan muhim qadam bo‘ladi.