Toshkent, O‘zbekiston (UzDaily.uz) — Ostona shahrida Qozog‘istonning “Yo‘lovchi tashish” AJ va O‘zbekistonning “O‘zbekiston temir yo‘llari” AJ rahbariyati o‘rtasida ishchi uchrashuv bo‘lib o‘tdi. Muzokaralarda Qozog‘iston va O‘zbekiston o‘rtasidagi yo‘lovchi tashish sohasida hamkorlikni rivojlantirish istiqbollari muhokama qilindi.

Muzokaralar doirasida ikki davlat o‘rtasida turistik poyezdlarni yo‘lga qo‘yish bo‘yicha kelishuv imzolandi, shuningdek, qo‘shma loyihalarni amalga oshirish uchun ishchi guruh tarkibi tasdiqlandi. Ushbu yo‘nalishdagi dastlabki qadam sifatida ikki davlat temir yo‘l kompaniyalari tomonidan tashkil etilgan “Jibek Joly” turistik poyezdi ishga tushirildi.

Mazkur yo‘nalishga bo‘lgan yuqori talab va uning ikki davlat uchun ahamiyatini inobatga olib, “Jibek Joly” loyihasini rivojlantirish, shuningdek, yangi turistik yo‘nalishlarni, jumladan, “Ostana-Samarqand” xalqaro yo‘nalishini ochish imkoniyatlari ko‘rib chiqildi. Bu Qozog‘iston va O‘zbekiston o‘rtasidagi turistik aloqalarni yanada mustahkamlashga xizmat qiladi.

Uchrashuvda xalqaro yo‘nalishlardagi poyezdlar jadvalini yo‘lovchilar uchun qulayroq qilish va yo‘lovchilar oqimini oshirish masalalari ham muhokama qilindi.

O‘zbekiston tomoni tashabbusi bilan №1/2 “Olmaota-Toshkent” poyezdi jadvalini qayta ko‘rib chiqish taklif etildi, bu yo‘lovchilar uchun jo‘nash va kelish vaqtlarini yanada qulay qilish imkonini beradi.

Shuni ta’kidlash joizki, №1/2 “Olmaota-Toshkent” poyezdi Qozog‘iston va O‘zbekiston o‘rtasidagi transport aloqasida muhim o‘rin tutadi. O‘tgan yili mazkur yo‘nalishda 72 mingdan ortiq yo‘lovchi tashilgan bo‘lib, bu yo‘nalishga qiziqish ortib borayotganini ko‘rsatadi. Ikki davlat o‘rtasidagi masofa 988 km ni tashkil etadi.

Shuningdek, tashrif davomida yo‘lovchi tashish sohasini boshqarish, harakat tarkibini texnik xizmat ko‘rsatish, axborot tizimlarini joriy etish va chiptalarni onlayn sotishni tashkil etish bo‘yicha tajriba almashish masalalari muhokama qilindi.

“Yo‘lovchi tashish” AJ va “O‘zbekiston temir yo‘llari” AJ yo‘lovchilarga xizmat ko‘rsatish sifatini yaxshilash va Qozog‘iston hamda O‘zbekiston o‘rtasida tashish hajmini oshirish maqsadida hamkorlikni rivojlantirishga tayyor ekanliklarini tasdiqladilar.