Toshkent, O‘zbekiston (UzDaily.uz) — O‘zbekiston Respublikasi investitsiyalar, sanoat va savdo vaziri Laziz Kudratov 20–21 avgust kunlari Dohada Qatarning davlat va biznes sektori vakillari bilan qator uchrashuvlar o‘tkazdi. Muzokaralar investitsiya va tashqi savdo blokiga mas’ul vazirlar hamda Qatar Pharma, Tamam International, Almana Group, Ariane Real Estate, Retaj Group, Al Mansour Group, Petro White, Qatar Mining, Global Infrastructure Partners, Qatar Investment Authority va Al Jabor Trading kabi yetakchi kompaniyalar rahbarlari bilan bo‘lib o‘tdi.

O‘zbekiston tomoni energetika, farmatsevtika, mashinasozlik, qurilish materiallari, oziq-ovqat va to‘qimachilik sanoati, foydali qazilmalarni qazib olish va qayta ishlash, shuningdek, turizm yo‘nalishlarida investitsiya imkoniyatlarini taqdim etdi. Investitsion muhitning amaliy jihatlari – kapitalni himoya qilish kafolatlari, soliq va bojxona imtiyozlari, strategik loyihalar uchun maxsus sharoitlar – batafsil tushuntirib berildi.

Muzokaralar yakunida farmatsevtika mahsulotlarini mahalliylashtirish, elektrobus zavodi tashkil etish, qurilish va ko‘chmas mulk sohalarida loyihalarni amalga oshirish, “aqlli” shahar hududlarini rivojlantirish, foydali qazilmalarni qazib olish va qayta ishlash yo‘nalishlarida, shuningdek, turizm infratuzilmasi va mehmonxona biznesiga investitsiyalar kiritishga kelishildi. Shuningdek, tomonlar Imtiyozli savdo to‘g‘risidagi bitimni tayyorlash, 2026 yilda Dohada “Made in Uzbekistan” ko‘rgazmasini o‘tkazish hamda “O‘zbekiston – Qatar” Biznes kengashini tashkil etishga kelishib oldilar.

Erishilgan kelishuvlar tomonlarning strategik hamkorlikni kengaytirishga o‘zaro tayyorligini ko'rsatib, yuqori darajadagi bo‘lajak ikki tomonlama tadbirlar doirasida tasdiqlanadigan yangi qo‘shma loyihalar portfelini kengaytirishga zamin yaratdi.