Toshkent, O‘zbekiston (UzDaily.uz) — O‘zbekistonning Favqulodda va muxtor elchisi Oybek Eshonov kuni kecha Indoneziya Prezidenti Subianto Prabovoga ishonch yorliqlarini topshirdi, deb xabar bermoqda “Dunyo” axborot agentligi.

Marosimdan keyin boʻlib oʻtgan qisqa suhbatda Prezident Prabovo Indoneziya Oʻzbekiston bilan doʻstlik, oʻzaro hurmat va manfaatlarni hisobga olish tamoyillariga asoslangan munosabatlarni yuksak qadrlashini taʼkidladi.

Davlat rahbari, shuningdek, Indoneziya hukumati Toshkent bilan siyosiy muloqotni faollashtirish va ko‘p qirrali hamkorlikni mustahkamlashdan manfaatdor ekanini ta’kidladi.

Prezident Prabovo savdo, sarmoya, madaniyat, turizm va gumanitar aloqalar kabi turli sohalarda ikki tomonlama hamkorlikni chuqurlashtirish uchun salmoqli salohiyat mavjudligini qayd etdi.

Uchrashuv yakunida Prezident Prabovo O‘zbekiston Prezidentiga hurmat va ezgu tilaklarni yetkazdi.

Ishonch yorliqlarining topshirilishi O‘zbekiston va Indoneziya o‘rtasidagi munosabatlar rivojida yangi bosqichni boshlab beradi. Har ikki davlat oʻzaro manfaatli hamkorlikni mustahkamlashga qatʼiy qaror qildilar.