Toshkent, O‘zbekiston (UzDaily.uz) — Raqamli texnologiyalar vazirligi va IT Park vakillarining Hindistonning Bangalor shahriga tashrifi doirasida IT sohasining yetakchi tashkilotlari, jumladan NASSCOM uyushmasi, o‘yin ishlab chiqaruvchi studiyalar va “Acharya” universiteti bilan qator uchrashuvlar o‘tkazildi. Tashrifning asosiy maqsadi O‘zbekiston va Hindiston o‘rtasida axborot texnologiyalari va o‘yin ishlab chiqarish sohasidagi hamkorlikni mustahkamlash, shuningdek O‘zbekistonga xalqaro kompaniyalarni jalb etishdan iborat edi.

Bangalordagi NASSCOM direktori Bxaskar Kumar Verma bilan uchrashuvda O‘zbekiston va Hindiston o‘rtasidagi hamkorlikni kengaytirish, Hindistonning eksportga yo‘naltirilgan kompaniyalarini O‘zbekistonga jalb qilish va O‘zbekiston bozori haqidagi xabardorlikni oshirish uchun qo‘shma tadbirlar tashkil etish imkoniyatlari muhokama qilindi. IT va BPO sohasidagi 3000 dan ortiq yetakchi kompaniyalarni birlashtirgan “NASSCOM” O‘zbekiston bilan hamkorlik qilish va mamlakatga sarmoya kiritish imkoniyatlarini o‘rganishga qiziqish bildirdi.

“Biz O‘zbekiston bilan hamkorlikda ulkan salohiyatni ko‘ryapmiz. Bu rivojlanayotgan IT-ekotizimi va biznes uchun qulay sharoitlarga ega mamlakat. Ishonchimiz komilki, qo‘shma loyihalar va investitsiyalar har ikki mamlakatning texnologiya sohasida rivojlanishi uchun muhim ahamiyatga ega bo‘ladi" — dedi NASSCOM direktori Bxaskara Kumar Verma.

Tashrif davomida “Tentworks Interactive”, “Bombay Play”, “XIGMA Games” va “Second Quest” kabi o‘yin studiyalari bilan uchrashuv alohida e’tibor markazida bo‘ldi. “GDAI” (Hindiston O‘yin ishlab chiqaruvchilar uyushmasi) vakillari hind studiyalarining O‘zbekistonga tashrif buyurishiga qiziqish bildirdilar va ishlab chiqish hamda dizayn jamoalarini mamlakatga ko‘chirish imkoniyatlarini ko‘rib chiqdilar.

O‘zbekistonda “Tentworks Interactive” studiyasining ochilishi sanoat uchun muhim voqea bo‘ladi. Kompaniya “Becoming Pablo” o‘yinini ishga tushirishga tayyorgarlik ko‘rmoqda va IT Park imkoniyatlaridan foydalangan holda MDH va Yevropa bozorlari bilan ishlashni rejalashtirmoqda.

“Biz O‘zbekistonni kengayish uchun strategik joy sifatida tanladik. Buxoroda ofisning ochilishi kompaniyamiz uchun mintaqaviy rivojlanishning yangi bosqichi bo‘ladi va bu mintaqada o‘sish va rivojlanish uchun ajoyib sharoit yaratadi deb ishonamiz" — dedi “Tentworks Interactive” bosh direktori Jey Basani.

Tashrif doirasida delegatsiya Hindistonning texnologiya va muhandislik sohasidagi yetakchi ta’lim muassasalaridan biri bo‘lgan Bangalor shahridagi “Acharya” universitetiga ham tashrif buyurdi. Universitet o‘zining ilg‘or tajriba markazlari (Centers of Excellence) bilan faxrlanadi, ular doirasida “Wipro”, “IBM”, “Siemens”, “Adobe” va boshqa yirik kompaniyalar bilan yaqindan hamkorlik qilinadi. Tomonlar, shuningdek, Buxoroda mutaxassislarning malakasini oshirish va O‘zbekistonda IT-ekotizimini rivojlantirishni jadallashtirish imkonini beradigan shunday markazlarni tashkil etish imkoniyatlarini muhokama qildilar.

Bangalorga tashrif O‘zbekiston va Hindiston o‘rtasidagi IT va texnologiyalar sohasidagi strategik hamkorlikni chuqurlashtirishda muhim qadam bo‘ldi. O‘zaro manfaatdorlik va taraqqiyotga intilish O‘zbekistonda o‘zaro manfaatli hamkorlik va yangi ish o‘rinlari yaratish uchun zamin yaratmoqda. “NASSCOM”, Hindistonning yetakchi o‘yin studiyalari va universitetlari bilan hamkorlikni davom ettirish O‘zbekistonni IT va texnologiyalar sohasida yangi bosqichga olib chiqishi, startaplar va innovatsion loyihalarni rivojlantirish uchun yangi imkoniyatlar ochishi kutilmoqda.