Toshkent, O‘zbekiston (UzDaily.uz) — O‘zbekiston Tashqi ishlar vaziri o‘rinbosari Olimjon Abdullayev Germaniyaning «SBH West GmbH» («Stiftung Bildung & Handwerk») tashkiloti vakillari bilan uchrashdi. Mazkur tashkilot ta’lim va kasbiy rivojlanish sohasida ixtisoslashgan.

Uchrashuv davomida O‘zbekiston va Germaniya o‘rtasida kasbiy ta’lim hamda migratsiya sohasidagi hamkorlikni mustahkamlashga qaratilgan asosiy masalalar muhokama qilindi. Asosiy e’tibor uch tomonlama memorandumni amalga oshirishga qaratildi. Memorandum o‘zbekistonlik fuqarolarni Germaniyada yuk mashinalari va avtobus haydovchilari sifatida ish bilan ta’minlashni qo‘llab-quvvatlashga yo‘naltirilgan.

O‘zbekistonning hududlarida «SBH West GmbH» o‘quv markazlari filiallarini tashkil etish bo‘yicha kelishuvga erishildi. Ushbu markazlarda Germaniya mehnat bozori talablariga moslashtirilgan kasbiy ta’lim dasturlari amalga oshiriladi. Bu dasturlar bitiruvchilarga zarur ko‘nikma va malaka hosil qilish imkoniyatini beradi va ularni Germaniyada muvaffaqiyatli ish bilan ta’minlashga yordam beradi.

Erishilgan kelishuvlarni amalga oshirish O‘zbekiston fuqarolari uchun xalqaro mehnat bozorida yangi ish o‘rinlari yaratilishiga ko‘maklashadi hamda ta’lim, migratsiya va kasbiy rivojlanish sohasida O‘zbekiston va Germaniya o‘rtasidagi ikki tomonlama hamkorlikni rivojlantirishda muhim qadam bo‘ladi.