Toshkent, O‘zbekiston (UzDaily.uz) — O‘zbekiston investitsiyalar, sanoat va savdo vaziri Laziz Qudratov Estoniyaning O‘zbekistondagi favqulodda va muxtor elchisi Yaap Ora bilan uchrashuv o‘tkazdi. Uchrashuv davomida ikki tomonlama hamkorlikning joriy holati va uni yana-da kengaytirish istiqbollari muhokama qilindi.

Konstruktiv muloqot natijasida o‘zaro savdo hajmini oshirish va mahsulot turlarini kengaytirish bo‘yicha yangi imkoniyatlar aniqlandi. 2024 yilda O‘zbekiston va Estoniya o‘rtasidagi tovar ayirboshlash hajmi qariyb 150 million AQSH dollariga yetdi va 20% o‘sish qayd etildi. Bu asosan xizmatlar, og‘ir mashinasozlik mahsulotlari va tibbiy jihozlar hisobiga amalga oshirildi.

Tomonlar savdo aylanmasini yana-da oshirish uchun qo‘shimcha choralar ko‘rish zarurligi borasida yakdil fikrga keldilar. Xususan, Tallinn, Muo‘ga, Pyarnu va Sillamyae portlaridan foydalanish orqali o‘zbek mahsulotlarini Shimoliy va G‘arbiy Yevropa bozorlariga eksport qilish yo‘llarini diversifikatsiya qilish masalasi muhokama qilindi.

Uchrashuvda investitsiyaviy hamkorlik va sanoat kooperatsiyasini mustahkamlash choralari ham ko‘rib chiqildi. Hozirda O‘zbekistonda eston kapitali ishtirokida 31 ta korxona faoliyat yuritmoqda.

Shuningdek, ikki mamlakat ishbilarmon doiralarini yashil energetika, IT-texnologiyalar, suv xo‘jaligi, farmatsevtika, transport va logistika sohalaridagi yangi loyihalarni amalga oshirishga jalb qilish rejalari kelishib olindi.

Uchrashuv yakunida tomonlar muhokama qilingan barcha yo‘nalishlar bo‘yicha hamkorlikni chuqurlashtirishga tayyor ekanliklarini tasdiqladilar hamda 2025 yil uchun qo‘shma tadbirlar taqvimini kelishib oldilar.