Toshkent, O‘zbekiston (UzDaily.uz) — O‘zbekiston tashqi ishlar vaziri Baxtiyor Saidov AQSH Davlat kotibi Marko Rubio bilan telefon orqali muloqot o‘tkazdi.

O‘zining Telegram-kanalida vazir suhbat samimiy va samarali bo‘lganini taʼkidlab, unda ikki tomonlama va ko‘p tomonlama hamkorlikning muhim masalalari muhokama qilinganini maʼlum qildi.

O‘zbekiston Tashqi ishlar vazirligi va AQSH Davlat departamenti o‘rtasida strategik sheriklikni barcha sohalarda mustahkamlash maqsadida yaqin hamkorlikni davom ettirish bo‘yicha kelishuvga erishildi.

Saidovning so‘zlariga ko‘ra, tomonlar biznes aloqalarini rivojlantirish, o‘zaro savdo hajmini oshirish va Markaziy Osiyo hamda uning tashqarisida barqaror va farovon taraqqiyotni taʼminlash masalalariga alohida eʼtibor qaratgan.