Toshkent, O‘zbekiston (UzDaily.uz) — O‘zbekistonning gandbol bo‘yicha U-19 terma jamoasi uch nafar sportchi yosh chekloviga rioya etmagani sababli mamlakatimizda o‘tkazilayotgan Osiyo chempionatidan diskvalifikatsiya qilindi. Reglamentga ko‘ra, musobaqada faqat 2006 yilda va undan keyin tug‘ilgan o‘yinchilar ishtirok etishi mumkin edi.

Tekshiruvlar natijasida Anastasiya Xudoyyorova (2005 y.), Sevinch Erkabayeva (2004 y.) va Sabina Mullayeva (2005 y.) hujjatlarida yosh bo‘yicha nomutanosibliklar aniqlandi. Taʼkidlanishicha, Erkabayeva avval milliy jamoa sardori bo‘lgan, Brest shahrida o‘tgan MDH mamlakatlari o‘yinlarida ishtirok etgan va turnirning eng yaxshi markaziy himoyachisi sifatida tan olingan. Ushbu sportchilarning uchalasi ham 2024 yilda bo‘lib o‘tgan yoshlar o‘rtasidagi jahon chempionatida qatnashgan.

Osiyo gandbol federatsiyasi qaroriga ko‘ra, mazkur sportchilar 2026 yildagi U-20 jahon chempionatida ishtirok etish huquqiga ega bo‘lmagani uchun O‘zbekiston terma jamoasi final bosqichidan chetlatildi hamda guruhdagi barcha natijalar bekor qilindi.

Shuningdek, jamoa jahon chempionatiga yo‘llanmadan ham mahrum bo‘ldi.

O‘zbekiston gandbol federatsiyasi Xalqaro gandbol federatsiyasiga (IHF) ushbu qaror ustidan shikoyat arizasi yo‘lladi.