Toshkent, O‘zbekiston (UzDaily.uz) — O‘zbekiston Respublikasi Tashqi ishlar vaziri Baxtiyor Saidov “Markaziy Osiyo — Fors ko‘rfazi arab davlatlari hamkorlik kengashi” (FKADXK) doirasida tashqi ishlar vazirlarining uchinchi yig‘ilishida ishtirok etdi.

«Tashkil etilgan mazkur muhim anjuman uchun samimiy mehmondo‘stlik va mukammal tashkilotchilikka minnatdorlik bildiramiz. Qatnashgan uchrashuvimiz davomida eng dolzarb masalalar muhokama qilindi, shuningdek, rivojlanib borayotgan sheriklik munosabatlarimizni yana-da mustahkamlash va kengaytirish bo‘yicha samarali yondashuvlar ishlab chiqildi», — deya taʼkidladi Baxtiyor Saidov o‘zining Telegram-kanalida.

Shuningdek, vazir 5 may kuni bo‘lib o‘tadigan Samarqand sammiti ahamiyatiga alohida to‘xtalib, uni Markaziy Osiyo va Fors ko‘rfazi davlatlari o‘rtasidagi hamkorlikni chuqurlashtirish yo‘lida muhim bosqich, deya atadi.

«Biz umumiy qadriyatlar, strategik salohiyat va o‘xshash qarashlarga ega bo‘lgan holda, mintaqalarimiz o‘rtasidagi hamkorlik tarixi yangi bosqichga qadam qo‘yayotganini namoyon etyapmiz», — deya xulosa qildi O‘zbekiston tashqi siyosiy idorasi rahbari.