Toshkent, O‘zbekiston (UzDaily.uz) — O‘zbekiston Respublikasi Tashqi ishlar vaziri Baxtiyor Saidov AQSH Kongressi vakili Kerol Miller boshchiligidagi delegatsiyani qabul qildi. Uchrashuvda O‘zbekiston va AQSH o‘rtasidagi ikki tomonlama va ko‘p tomonlama hamkorlikning dolzarb masalalari muhokama qilindi.

O‘zbekiston tashqi ishlar vaziri taʼkidlaganidek, ikki davlat o‘rtasidagi strategik sheriklik siyosat, iqtisodiyot, madaniyat va xavfsizlik kabi barcha sohalarda izchil rivojlanib bormoqda. “Bizda hamkorlikni yana-da mustahkamlash uchun katta salohiyat mavjud va uni amalga oshirish uchun faol ishlashga tayyormiz”, — dedi u.

Uchrashuvda parlamentlararo aloqalarning ahamiyatiga alohida eʼtibor qaratildi. Tomonlar AQSH Kongressidagi “O‘zbekiston kokusi”ning faoliyatini yuqori baholab, uni ikki davlat o‘rtasidagi muloqotni mustahkamlashga xizmat qilayotgan muhim ko‘prik sifatida qayd etdilar. “Parlamentlar darajasidagi faol hamkorlik tashqi siyosatimizning ustuvor yo‘nalishlaridan biri bo‘lib qoladi”, — dedi Baxtiyor Saidov.

Shuningdek, xalqaro tashkilotlar doirasida hamkorlikni kengaytirish istiqbollari, shuningdek, mintaqaviy va global kun tartibidagi dolzarb masalalar bo‘yicha fikr almashildi.

Tomonlar O‘zbekiston va AQSH o‘rtasidagi sheriklikning yana-da chuqurlashishi Markaziy Osiyo va undan tashqarida barqarorlik hamda farovonlikni mustahkamlashga xizmat qilishini taʼkidladilar.