Toshkent, O‘zbekiston (UzDaily.uz) — 2025-yil 7-iyul kuni Turizm qo‘mitasi raisining birinchi o‘rinbosari Djamshid Abdusalamov Xitoyning Sindao shahrida bo‘lib o‘tgan Shanxay hamkorlik tashkiloti (ShHT) a’zo davlatlari turizm ma’muriyatlari rahbarlarining yig‘ilishida ishtirok etdi.

Tadbir turizm sohasidagi ko‘p tomonlama hamkorlikni mustahkamlash, qo‘shma tashabbuslarni muhokama qilish va ShHT mamlakatlari o‘rtasida sayyohlik almashinuvini rivojlantirish bo‘yicha harakatlarni muvofiqlashtirish maqsadida o‘tkazildi.

Yig‘ilish doirasida sayyohlar uchun viza tartiblarini soddalashtirish, davlatlararo sayyohlik yo‘nalishlarini rivojlantirish va targ‘ib qilish, shuningdek, qo‘shma madaniy-turistik tadbirlarni tashkil etish kabi muhim masalalar ko‘rib chiqildi.

O‘z nutqida Djamshid Abdusalamov ShHT doirasidagi hamkorlikni chuqurlashtirish muhimligini ta’kidlab, madaniy, ekologik va tadbiriy turizmni rivojlantirish salohiyatiga alohida e’tibor qaratdi. O‘zbekistonning turistik xizmatlarini raqamlashtirish sohasidagi muvaffaqiyatli tajribasi, ayniqsa xizmatlar sifatini oshirish va ma’lumotlardan foydalanish imkoniyatini kengaytirishga qaratilgan yutuqlari alohida e’tirof etildi.

Yig‘ilishda ishtirokchi davlatlarning turizm boshqaruv organlari o‘rtasida doimiy muloqotni yo‘lga qo‘yish, marketing strategiyalarini muvofiqlashtirish, sayyohlik bozorlari va tendensiyalari bo‘yicha tahliliy ma’lumotlar almashish masalalariga alohida e’tibor qaratildi.

Uchrashuv yakunida ishtirokchilar ShHT doirasida yagona sayyohlik makonini shakllantirish bo‘yicha faol hamkorlikni davom ettirishga tayyorliklarini bildirdilar. Mintaqani xalqaro sayyohlar uchun jozibador yaxlit turizm yo‘nalishi sifatida targ‘ib qilishga qaratilgan tashabbuslar qo‘llab-quvvatlandi.