Toshkent, O‘zbekiston (UzDaily.uz) — O‘zbekistonda sanʼatkorlar kamtarlikka rioya qilish va dinni targ‘ib etmaslikka chaqirildi. Bu haqda “O‘zbekkonsert” davlat muassasasi tomonidan tashkil etilgan «Sanʼatkor odobi» yig‘ilishida muhokama qilindi, deb xabar beradi Madaniyat vazirligi matbuot xizmati.

Yig‘ilishda litsenziya talablariga qatʼiy amal qilish, konsert faoliyatida diniy targ‘ibotga yo‘l qo‘ymaslik, shuningdek, mamlakat Konstitutsiyasi va qonunchilik normalariga rioya etish muhimligi taʼkidlandi.

Milliy qadriyatlar, maʼnaviyat va madaniyatni asrash masalasiga alohida eʼtibor qaratildi. Ijodkorlarga yolg‘on axborot, bo‘xton va mish-mishlarni tarqatishdan voz kechish, hamkasblar obro‘siga putur yetkazishi mumkin bo‘lgan harakatlardan tiyilish zarurligi eslatib o‘tildi.

Sanʼatkorlar jamoat joylarida odob-axloq qoidalariga rioya qilish, anʼanalarga hurmat bilan yondashish va kamtar hayot tarzini targ‘ib qilishga daʼvat etildi.

Shuningdek, qo‘shiqlar mazmuni, mualliflik huquqlarini himoya qilish va Vatanparvarlik hamda yurtga bo‘lgan muhabbatni tarannum etuvchi asarlar sonini oshirish zarurligi haqida ham fikr yuritildi.