Toshkent, O‘zbekiston (UzDaily.uz) — O‘zbekiston Respublikasi Prezidenti Shavkat Mirziyoyev mamlakat xalqini kirib kelayotgan 2025-yil bilan tabriklab, o‘tgan yil yutuqlarini ta’kidladi va kelajakdagi ustuvor vazifalarni belgilab berdi.

«Siz, azizlarni, ko‘pmillatli O‘zbekiston xalqini yangi – 2025-yil bilan chin qalbimdan muborakbod etaman», — dedi prezident o‘z murojaatida.

Shavkat Mirziyoyev 2024-yilning murakkab global vaziyatga qaramay, mamlakat uchun muvaffaqiyatli bo‘lganini ta’kidladi. U «Yangi O‘zbekiston» g‘oyasini amalga oshirishda xalqning «fidokorona mehnati va ijtimoiy-siyosiy faolligi»ni yuqori baholadi. Prezident shuningdek, Oliy Majlis va mahalliy kengashlarga o‘tkazilgan saylovlar demokratik islohotlar yangi bosqichga kirganini tasdiqlaganini qayd etdi.

Davlat rahbari infratuzilma, IT, biznes va turizm sohalarida amalga oshirilgan ulkan o‘zgarishlarni sanab o‘tdi. «Yurtimizda yuqori texnologiyali yangi sanoat majmualari, infratuzilma va logistika tarmoqlari, avtomobil va temir yo‘llar barpo etildi», — dedi u. Prezidentning so‘zlariga ko‘ra, aholi daromadlari va turmush darajasi oshdi, fermerlar mehnati tufayli farovon hosil olindi.

Shavkat Mirziyoyev yoshlar yutuqlarini alohida ta’kidlab, «Olimpiya va Paralimpiya o‘yinlarida erishilgan rekord natijalar milliy sportimiz tarixida yangi sahifa ochdi», dedi. Prezident O‘zbekistonning xalqaro maydondagi nufuzi ortishini mamlakatning barqaror rivojlanishi hamda jamiyatdagi do‘stlik va hamjihatlik muhiti bilan bog‘ladi.

Prezident 2025-yilni Atrof-muhitni muhofaza qilish va «yashil iqtisodiyot» yili deb e’lon qilib, iqtisodiyot va tabiat o‘rtasida muvozanatni ta’minlash muhimligini qayd etdi. «Yangi yilda biznes uchun yanada keng imkoniyatlar yaratiladi. Xususiy mulk daxlsizligini ta’minlash, xorijiy investitsiyalarni faol jalb etish ishlarini qat’iy davom ettiramiz», — dedi u.

2025-yildagi ustuvor vazifalar sifatida Shavkat Mirziyoyev maoshlar, pensiyalar, stipendiyalar va nafaqalarni oshirish, shuningdek, fan, ta’lim, sog‘liqni saqlash, madaniyat va sportni rivojlantirishni ta’kidladi. U faxriylar, ayollar, yoshlar va harbiy xizmatchilarni qo‘llab-quvvatlash zarurligini qayd etar ekan, «Qurolli Kuchlarimiz salohiyatini mustahkamlash, harbiy xizmatchilar va ularning oila a’zolarini qo‘llab-quvvatlash ishlarini yangi bosqichga ko‘taramiz. », — deya qo‘shimcha qildi.

Murojaat yakunida prezident har bir fuqaroga sog‘lik-salomatlik, baxt va farovonlik tiladi. «Azizlar, yana bir bor Yangi yil bilan! Buyuk Vatanimiz – O‘zbekiston yanada ravnaq topaversin!» — dedi u.