Toshkent, O‘zbekiston (UzDaily.uz) — O‘zbekiston Respublikasi Prezidenti Shavkat Mirziyoyev Xitoy Xalq Respublikasi Raisi Si Szinpinga Xitoyning Shigatsze shahrining Dinji tumanida sodir bo‘lgan kuchli zilzila munosabati bilan hamdardlik telegrammasi yo‘lladi.

O‘z murojaatida davlat rahbari halok bo‘lganlarning yaqinlari va oilalariga chuqur hamdardlik bildirdi hamda jabrlanganlarga tezroq shifo topishini tiladi.

2025-yil 7-yanvar kuni mahalliy vaqt bilan soat 9:05 da (Toshkent vaqti bilan 4:05) Xitoyning Sitszan (Tibet) avtonom viloyatidagi Shigatsze shahrining Dinji (Tingri) tumanida magnitudasi 6,8 bo‘lgan zilzila sodir bo‘ldi.

So‘nggi ma’lumotlarga ko‘ra, ushbu tabiiy ofat oqibatida 100 ga yaqin inson hayotdan ko‘z yumdi, yana 130 kishi turli darajada jarohat oldi.

Zilzila hudud infratuzilmasiga katta zarar yetkazgan: 1 000 dan ortiq inshoot vayron bo‘ldi yoki shikastlandi.

Yer silkinishlarining epitsentri Dinji tumanidagi Sogo qishloq okrugida, 28,50° shimoliy kenglik va 87,45° sharqiy uzunlik koordinatalari bo‘yicha, 10 km chuqurlikda joylashgan.

Epitsentrning 20 km atrofida taxminan 6 900 kishi istiqomat qiladi, umumiy aholi soni esa 61 000 kishidan oshadi.