Toshkent, O‘zbekiston (UzDaily.uz) — O‘zbekiston Migratsiya agentligi Turkiyaning yirik qurilish kompaniyasi Kalyon Insaat Sanayi Ve Ticaret A.Ş. bilan respublika fuqarolarini ishga joylashtirish bo‘yicha kelishuvga erishdi, deb xabar beradi agentlik matbuot xizmati.

Uchrashuv davomida Migratsiya agentligi direktori Behzod Musayev kompaniya vakillari bilan turk qurilish loyihalarida o‘zbekistonliklarni ishtirok ettirish masalalarini muhokama qildi.

Birinchi bosqich doirasida, joriy yilning dekabr oyida Turkiyaga 60 nafar o‘zbekistonlik ishga yuboriladi. Tuzilgan mehnat shartnomalariga muvofiq, transport, yashash, uch mahallik ovqatlanish, maxsus kiyim va shaxsiy himoya vositalari kabi barcha xarajatlarni ish beruvchi qoplaydi.

Bundan tashqari, kompaniya munosib ish haqini va mehnat huquqlarini ta’minlashga kafolat beradi.

Kalyon Insaat kompaniyasining kadrlar boshqaruvi direktori Akin Kirchichek shunday dedi:

"Biz o‘z loyihalarimizda band bo‘lgan o‘zbekistonliklarning mehnat sharoitlarini diqqat bilan nazorat qilamiz va 2024-yilning yanvar oyida yana 1350 nafar mutaxassisni Turkiya bozorida ish bilan ta’minlaymiz".

Kalyon Insaat Sanayi Ve Ticaret A.Ş. 1974-yildan buyon Turkiyada faoliyat yuritib, qurilish, energetika va transport sohalarida yirik loyihalarni amalga oshirib kelmoqda. Kompaniyaning e’tiborga molik obyektlari qatorida Istanbul aeroporti, Bosfor bo‘g‘ozi ostidagi Marmaray temir yo‘l tunneli va Karapinardagi eng yirik quyosh elektr stansiyasi bor.