Toshkent, O‘zbekiston (UzDaily.uz) — 2025-yilda O‘zbekiston Amerika Qo‘shma Shtatlari bilan strategik sheriklikni mustahkamlashni rejalashtirmoqda. Bu rejalar 2025 yilgi Davlat dasturida bayon etilgan.

Asosiy ustuvor vazifalar qatoriga AQSHning yangi ma’muriyati vakillari bilan yaqin hamkorlik o‘rnatish, oliy darajada tashrif tashkil etish, shuningdek, ikki davlat yuqori lavozimli shaxslari ishtirokida Toshkentda kengaytirilgan strategik sheriklik bo‘yicha ilk muloqotni o‘tkazish kiradi.

Bundan tashqari, yil oxirigacha «C5+1» formatidagi faoliyatni kuchaytirish rejalashtirilgan, jumladan, vazirlar uchrashuvlari, tegishli ishchi guruhlar majlislari va ushbu formatning o‘n yilligi munosabati bilan Samarqandda yubiley sammiti o‘tkazish bo‘yicha masalalarni ishlab chiqarish rejalashtirilmoqda.

Dasturda parlamentlararo aloqalarni rivojlantirishga alohida e’tibor qaratilgan. Shu doirada AQSH Kongressining asosiy a’zolarining O‘zbekistonga tashriflari tashkil etilishi ko‘zda tutilgan.

O‘zbekiston hukumati savdo- investitsiya hamkorligini jadal rivojlantirishni maqsad qilmoqda. Amerika qit’asi mamlakatlaridan salohiyatli investorlarni jalb qilish uchun biznes-forumlar, ko‘rgazmalar va boshqa tadbirlar o‘tkazish rejalashtirilmoqda.

Xavfsizlik sohasidagi hamkorlik ham muhim yo‘nalish hisoblanadi.

O‘zbekiston va AQSH inson huquqlari bo‘yicha turli xalqaro hisobotlarda mamlakatning yuqori reytingini saqlab qolish uchun qo‘shma ishlarni davom ettirish niyatida.

Shu bilan birga, ta’lim, ilm-fan, sog‘liqni saqlash va atrof-muhitni muhofaza qilish sohalaridagi aloqalarni kengaytirish ko‘zda tutilgan.

Xususan, universitetlararo hamkorlikni rivojlantirish, ingliz tilini o‘qitish, shuningdek, ilmiy va ekologik dasturlarni amalga oshirishga qaratilgan qo‘shma loyihalarni yo‘lga qo‘yish rejalashtirilmoqda.