Toshkent, O‘zbekiston (UzDaily.uz) — 2024-yilning 11-dekabr kuni Toshkentdagi “First Dry Port Terminal” MChJ terminallaridan Braziliyaga ilk blok-poezd jo‘nab ketdi.

LogiStan xabariga ko‘ra, poezd tarkibida har birida 28 tonna karbamid bo‘lgan 54 ta qirq futlik konteyner mavjud.

Poezd marshruti O‘zbekiston, Turkmaniston, Ozarbayjon va Gruziya orqali o‘tadi. Gruziyaning Poti portida konteynerlar kemaga yuklanib, Braziliyaning Paranagua portiga dengiz orqali yetkaziladi, deya ma’lum qildi First Dry Port Terminal vakili.

Yuk jo‘natuvchi O‘zbekistonning kimyo sanoatida eksport-import operatsiyalarining yagona agenti bo‘lgan "Uzkimyoimpeks" kompaniyasidir.

Yetkazib berishning taxminiy muddati 60–70 kunni tashkil etadi. Konteynerlar O‘zbekistondan Poti portigacha 20 kunda yetkaziladi, dengiz orqali esa 35–45 kun davom etadi.