Toshkent, O‘zbekiston (UzDaily.uz) — O‘zbekiston fuqarolari Tailandga sayohat qilish uchun elektron vizani rasmiylashtirish imkoniga ega bo‘ladilar, deb xabar bermoqda «Dunyo» nashri.

Tailand barcha davlat fuqarolari uchun elektron vizalarni olish imkoniyatini joriy qildi. Yangi tizim Tailandning 94 diplomatik vakolatxonasida amal qiladi va vizani onlayn shaklda thaievisa.go.th platformasi orqali rasmiylashtirish mumkin bo‘ladi.

Ariza topshirish uchun endi pasportning originali yoki boshqa hujjatlarni konsullik muassasalariga taqdim etish talab etilmaydi.

Viza tasdiqlangandan so‘ng, ruxsatnomani chop etish va samolyotga chiqish hamda Tailandning chegara nazoratidan o‘tish paytida ko‘rsatish yetarli.

Shuningdek, eslatib o‘tish joizki, 2024-yilning 15-iyulidan boshlab O‘zbekiston va Tailand o‘rtasida vizasiz rejim amal qilmoqda, bu rejim O‘zbekiston fuqarolariga Tailand hududida 60 kungacha vizasiz bo‘lish imkonini beradi.