Toshkent, O‘zbekiston (UzDaily.uz) — 2025 yil 1 iyundan boshlab Bahrayn, Quvayt va Ummon fuqarolari O‘zbekistonga vizasiz kirib kelish huquqiga ega bo‘ladi va mamlakat hududida 30 kungacha vizasiz bo‘lib turishlari mumkin bo‘ladi.

Mazkur qaror Prezident tomonidan mamlakatda turizmni jadal rivojlantirish va xorijiy mehmonlar sonini oshirish strategiyasi doirasida imzolangan.

Adliya vazirligi maʼlumotiga ko‘ra, 2025 yil oxirigacha O‘zbekiston 15,8 milliongacha xorijiy turistni qabul qilishni rejalashtirmoqda. Shu bilan birga, turistik xizmatlar eksporti 4 milliard dollarga yetishi kutilmoqda.

Bu bilan birga, ichki turizm ham rivojlantiriladi. Hukumat mamlakat bo‘ylab ichki sayohatlar sonini yiliga 40 milliongacha yetkazishni maqsad qilgan. Ushbu maqsadga erishish uchun 2025 yilda 378 ta yangi turoperator faoliyatini boshlaydi.

Vizasiz rejimni kengaytirish — O‘zbekistonning Markaziy Osiyodagi turizm markazi sifatidagi mavqeini mustahkamlash, investitsiyalarni jalb etish va milliy madaniy merosni targ‘ib qilishdagi muhim qadamlardan biridir.