Toshkent, O‘zbekiston (UzDaily.uz) — O‘zbekiston Respublikasi Bosh prokuraturasi Komil Allamjonovga qasddan suiqasd sodir etilishi bilan bog‘liq jinoyat ishi bo‘yicha tergov harakatlarini davom ettirmoqda.

Tergov jarayonida Rossiya Federatsiyasi fuqarolari Bislan Rasayev va Shamil Temirxanov bir qator jinoyat sodir etgani aniqlandi.

Rasayev va Temirxanov O‘zbekiston Respublikasi Jinoyat kodeksining tegishli moddalari bo‘yicha ayblanuvchi sifatida sirtdan javobgarlikka tortilgan va ularga nisbatan qamoqqa olish tarzidagi ehtiyot chorasi qo‘llanilgan. Ushbu shaxslar xalqaro qidiruvga berilgan.

Bislan Rasayev va Shamil Temirxanov haqidagi ma’lumotlar Interpol veb-saytida joylashtirilgan.

Tergov organlari jinoyatning barcha holatlarini aniqlash va aybdorlarni javobgarlikka tortish bo‘yicha ishlarini davom ettirmoqda.

Eslatib o‘tamiz, 26-oktyabr kuni tongga yaqin Qibray tumanidagi temir yo‘l kesishmasida noma’lum shaxslar Range Rover avtomashinasiga o‘q uzgan. Ushbu mashinada Prezident Administratsiyasining sobiq xodimi Komil Allamjonov bo‘lgan. Hujumdan keyin jinoyatchilar hodisa joyidan qochib ketgan. Avtomobilda bo‘lgan shaxslar, jumladan haydovchi, jabrlanmagan.

Mazkur hodisa bo‘yicha O‘zbekiston Respublikasi Jinoyat kodeksining 97-moddasi (qasddan odam o‘ldirishga suiqasd) va 248-moddasi (qurol-yarog‘ni noqonuniy aylantirish) asosida jinoyat ishi qo‘zg‘atilgan.