Toshkent, O‘zbekiston (UzDaily.uz) — Osiyo taraqqiyot banki (OTB) va Ipak yo‘li bank O‘zbekistonda shaharlardagi mikro, kichik va o‘rta korxonalarining (MKO‘K) moliya olish imkoniyatini kengaytirish uchun 625 milliard so‘m (taxminan 50 million AQSH dollari ekvivalenti) miqdorida qarz kelishuvini imzoladilar.

Qarzning asosiy qismi MKO‘K uchun moliyaviy inklyuzivlikni qo‘llab-quvvatlashga yo‘naltiriladi va  ularning 60 foizi poytaxt Toshkent shahridan tashqarida joylashgan.   Qarzning kamida 20 foizi ayollarga tegishli bo‘lgan yoki ular tomonidan boshqaradigan MKO‘K-ga, kamida 10 foizi esa yashil texnologiyalarga investitsiya qilishga yo‘naltiriladi.  Mamlakatdagi yarim millionga yaqin MKO‘K iqtisodiyotning muhim tayanchi bo‘lib, YAIM-ning 50% dan ortig‘ini tashkil etadi va mehnatga layoqatli aholining ko‘p qismini ish bilan ta’minlaydi.   Biroq, ular bank kreditlarini olishda qiyinchiliklarga duch keladi, ayniqsa, agar egalari ko‘pincha asosiy moliyaviy va boshqaruv ko‘nikmalariga ega bo‘lmagan ayollar bo‘lsa.

“OTBning fikricha, MKO‘K-ni qo‘llab-quvvatlash nafaqat iqtisodiy o‘sishga, balki jamiyatlarning ijtimoiy va moliyaviy farovonligiga sarmoyadir.   Kichik biznes innovatsiyalar, yangi ish o‘rinlarining yaratilishi va iqtisodiy barqarorlikni ta’minlashda muhim omil bo‘lib hisoblanadi”, dedi OTBning Xususiy sektor operatsiyalari bo‘yicha Bosh direktori Syuzanna Gaburi. "Ushbu tashabbus kichik biznes yashil rivojlanishni ta’minlash va turmush darajasini yaxshilash uchun zarur bo‘lgan resurslarni olishini ta’minlash orqali iqtisodiyotning tuzilishini mustahkamlaydi."  

“Ipak yo‘li banki O‘zbekistonda moliyaviy xizmatlar bilan yetarlicha qamrab olinmagan hududlar va tarmoqlarga moliyaviy xizmatlar ko‘rsatishda muhim rol o‘ynaydi.  Yangi moliyalashtirish orqali biz MKO‘K-larga nisbatan qamrov darajamizni va ularga xizmat ko‘rsatish imkoniyatlarimizni oshiramiz, bu esa inklyuziv iqtisodiy o‘sishni rag‘batlantiradi”, dedi Ipak yo‘li banki Boshqaruvi raisi Saidabror Saidahmedov.

Ipak yo‘li banki 1990-yilda tashkil etilgan bo‘lib,  shaharlardagi MKO‘K-larga katta e’tibor qaratadi va 17 ta filial, 49 ta xizmat ko‘rsatish markazi va ko‘plab savdo kanallariga ega bo‘lgan mamlakatdagi to‘rtinchi yirik xususiy bank hisoblanadi.  Ilgari OTB Ipak yo‘li banki aksiyadorlik kapitalining sarmoyadori bo‘lgan.

OTB o‘ta qashshoqlikka barham berish bo‘yicha sa’y-harakatlarini davom ettirib, rivojlangan, keng qamrovli va barqaror Osiyo va Tinch okeani mintaqasiga erishishga intiladi.  OTB 1966 yilda tashkil etilgan bo‘lib, unga 69 mamlakat a’zo bo‘lgan. Ularning 49 tasi mintaqada joylashgan.