Toshkent, O‘zbekiston (UzDaily.uz) — O‘zbekiston parlamenti delegatsiyasining Qozog‘iston Respublikasiga rasmiy tashrifi doirasida Oliy Majlis Senati Raisi Tanzila Narbayeva va Qozog‘iston Respublikasi Parlamenti Senati Raisi Maulen Ashimbayev o‘rtasida uchrashuv bo‘lib o‘tdi.

Parlamentlararo hamkorlikni yanada chuqurlashtirishga doir keng ko‘lamli masalalar, shuningdek, siyosiy, iqtisodiy, gumanitar va mintaqaviy sohalardagi ikki tomonlama hamkorlikning ustuvor yo‘nalishlari muhokama qilindi.

Suhbat chog‘ida ikki davlat rahbarlarining qatʼiy siyosiy irodasi tufayli O‘zbekiston-Qozog‘iston munosabatlari har tomonlama strategik sheriklik va ittifoqchilik darajasiga ko‘tarilgani taʼkidlandi.

Parlamentlararo munosabatlar ham ikki tomonlama, ham ko‘p tomonlama shaklda yangi bosqichga ko‘tarilgani taʼkidlandi. Markaziy Osiyo mamlakatlarining Ikkinchi parlamentlararo forumi yakunlari va Qozog‘iston delegatsiyasining Parlamentlararo ittifoqning 150-assambleyasida  ishtiroki yuqori baholandi.

Navbatdagi majlisi joriy yilning to‘rtinchi choragida O‘zbekistonda o‘tkaziladigan ikki mamlakat Senatlari o‘rtasidagi hamkorlik bo‘yicha parlamentlararo komissiyaning samarali faoliyati qayd etildi.

Shuningdek, tomonlar O‘zbekiston Respublikasi Oliy Majlisi huzuridagi Barqaror rivojlanish sohasidagi maqsad va vazifalar amalga oshirilishini nazorat qilish bo‘yicha Parlament komissiyasi hamda Qozog‘iston Respublikasi Parlamentining shunday komissiyasi o‘rtasidagi hamkorlikni kengaytirish istiqbollari ham muhokama qilindi.

Uchrashuv yakuni bo‘yicha parlamentlararo muloqotni chuqurlashtirish va xalqaro maydonda qo‘shma tashabbuslarni ilgari surishga qaratilgan O‘zbekiston Respublikasi Oliy Majlisi Senati va Qozog‘iston Respublikasi Parlamenti Senati o‘rtasida 2025-2026-yillarga mo‘ljallangan hamkorlikni rivojlantirish bo‘yicha “yo‘l xaritasi” imzolandi.