Toshkent, O‘zbekiston (UzDaily.uz) — 2024-yilning oʻn bir oyi davomida Oʻzbekiston 3,8 million dona mobil telefon import qildi, deya xabar beradi Statistika agentligi.

Ushbu koʻrsatkich 2023-yilning umumiy hajmidan oshdi, oʻtgan yili mamlakatga 3,4 million dona qurilma keltirilgan edi.

Joriy yilda importning umumiy qiymati 346,5 million AQSh dollarini tashkil etdi.

Xitoy Oʻzbekistonga mobil telefon yetkazib berishda yetakchi boʻlib qolmoqda: mamlakatdan 3,1 million dona qurilma olib kirilgan.

Ikkinchi oʻrinda Vetnam turibdi, bu davlatdan 535,5 ming dona telefon import qilingan, ulardan 130 ming donasi kuz oylarida olib kelingan.

Uchinchi oʻrinni Hindiston egalladi, bu mamlakatdan 110,7 ming dona telefon import qilingan.

Shuningdek, Gonkongdan olib kelingan mobil telefonlar hajmi sezilarli darajada oshdi — 11 oyda bu yerdan 43,2 ming dona qurilma olib kirilgan.

Boshqa barcha mamlakatlardan jami 5,1 ming dona mobil telefon import qilingan.