Toshkent, O‘zbekiston (UzDaily.uz) — 2025-yil 14-iyun kuni Mo‘g‘ulistonning Ulan-Bator shahrida O‘zbekiston Respublikasi Transport vaziri o‘rinbosari Jasurbek Choriyev “Hunnu Air” aviakompaniyasi rahbari Purevjav Munxjargal bilan uchrashdi.

Uchrashuvda O‘zbekiston va Mo‘g‘uliston o‘rtasida fuqaro aviatsiyasi sohasidagi hamkorlikni rivojlantirish masalalari muhokama qilindi.

Xususan, Ulan-Bator shahridan Toshkentga to‘g‘ridan to‘g‘ri aviaqatnovlarni yo‘lga qo‘yish, Mo‘g‘uliston fuqarolari uchun O‘zbekiston aeroportlari orqali uchinchi mamlakatlarga tranzit parvozlarni amalga oshirish, ikki mamlakat turizm salohiyatidan, qolaversa, tranzit yuklarni tashish bo‘yicha hamkorlikni yo‘lga qo‘yish bilan bog‘liq jihatlar ko‘rib chiqildi.

Uchrashuvda muhokama etilgan masalalar yuzasidan tomonlar kelgusida amalga oshirilishi lozim bo‘lgan ishlarni belgilab olishdi.