Toshkent, O‘zbekiston (UzDaily.uz) — O'zbekiston elchixonasida Nigeriyaning "K.K.Kingdom Group" kompaniyasi biznes aloqalari bo'yicha maslahatchisi, misrlik tadbirkor Muhammad Hasib bilan uchrashuv o'tkazildi, deb xabar qilmoqda "Dunyo" AA muxbiri.

"K.K.Kingdom Group" Nigeriyaning yirik xususiy kompaniyalaridan biri sanaladi. U ishlab chiqarish, ko'chmas mulk, muhandislik va qurilish, energetika, qishloq xo'jaligi sohalarida faoliyat yurituvchi qator korxonalarni o'z ichiga oladi. Shuningdek, kompaniya mamlakatning Kaduna shtatida 718 gektar yer maydonda "Yashil iqtisodiy zona" (Green Economic Zone - GEZ) tashkil qilgan. 

Mazkur hududda 250 MVt quvvatga ega quyosh elektr stansiyasi, to'qimachilik fabrikasi, qishloq xo'jaligi mahsulotlarini qayta ishlash korxonalari, mashinasozlik, kiyim-kechak va moda, savdo, xizmat ko'rsatish, elektronika va oziq-ovqat sanoati sohalaridagi boshqa ko'plab klasterlar joylashgan. GEZ qulay transport-logistika sharoitlari, jumladan avtomobil, temir va havo yo'llari marshrutlariga ega.

Muloqot chog'ida misrlik tadbirkor O'zbekistondagi manfaatdor kompaniya va korxonalar bilan hamkorlik o'rnatishga katta qiziqish bildirdi. U, shuningdek, mamlakatimiz tadbirkorlarining GEZ hududida o'z bizneslarini yo'lga qo'yishlariga amaliy yordam berishga tayyor ekanini ta’kidladi.

Tomonlar mazkur yo'nalishda hamkorlikni rivojlantirish va O'zbekistondagi manfaatdor korxonalar vakillari bilan onlayn muzokaralar tashkil qilish to'g'risida kelishib olishdi.