Toshkent, O‘zbekiston (UzDaily.uz) — Namanganda O‘zbekiston Davlat xavfsizlik xizmati (DXX) xodimlari umumtaʼlim maktablaridan birining direktor o‘rinbosarini imtihon javoblarini pul evaziga taqdim qilishda gumonlab qo‘lga olishdi.

Tergov maʼlumotlariga ko‘ra, ushbu shaxs abituriyentlarga milliy sertifikat olish imkonini beruvchi test savollari va javoblarini taqdim etmoqchi bo‘lgan. Bu sertifikat “Kimyo” va “Biologiya” yo‘nalishlari bo‘yicha oliy o‘quv yurtlariga kirishda imtiyoz beradi.

U o‘z xizmatlari uchun 20 ming AQSH dollari talab qilgan bo‘lib, materiallarni uzatishni o‘z tanishlari orqali amalga oshirishni rejalashtirgan.

Erkak 8 ming AQSH dollari va 156 million so‘mni olayotgan vaqtda jinoyat ustida ushlangan.

Unga nisbatan Jinoyat kodeksining 168-moddasi 4-qismi “a” bandi (“Firibgarlik”) bo‘yicha jinoyat ishi qo‘zg‘atilgan, tergov ishlari olib borilmoqda.