Toshkent, O‘zbekiston (UzDaily.uz) — 15 fevral kuni AQSH tomoni tashabbusi bilan Rossiya tashqi ishlar vaziri Sergey Lavrov va AQSH davlat kotibi Marko Rubio o‘rtasida telefon muloqoti bo‘lib o‘tdi.

12 fevral kuni Rossiya va AQSH prezidentlari o‘rtasida o‘tkazilgan muzokaralarning davomi sifatida ikki davlat tashqi siyosat idoralari rahbarlari rossiya-amerika munosabatlarida to‘planib qolgan muammolarni hal etish uchun muloqot kanalini qo‘llab-quvvatlashga kelishib oldilar.

Jumladan, avvalgi maʼmuriyat tomonidan joriy qilingan va o‘zaro manfaatli savdo-iqtisodiy va investitsiyaviy hamkorlikni rivojlantirishga to‘siq bo‘layotgan bir tomonlama cheklovlarni bekor qilish masalasi muhokama qilindi.

Tomonlar Ukraina atrofidagi nizoni tartibga solish, Falastindagi vaziyat, shuningdek, Yaqin Sharq va boshqa mintaqalardagi inqirozlar bo‘yicha harakatlarni muvofiqlashtirishdan o‘zaro manfaatdor ekanliklarini bildirdi.

Muzokaralar chog‘ida 2016 yilda Barak Obama maʼmuriyati tomonidan Rossiya diplomatik vakolatxonalariga nisbatan joriy qilingan cheklovlar mavzusi ham ko‘tarildi. Bu choralar Rossiya tomonidan javob harakatlarini keltirib chiqargan edi. Shu munosabat bilan, tomonlar ikki davlat diplomatik vakolatxonalarining normal faoliyatiga to‘siq bo‘layotgan muammolarni hal etish uchun mutaxassislar uchrashuvini tashkil etishga kelishib oldilar.

Lavrov va Rubio prezidentlar belgilagan yo‘nalishda o‘zaro hurmatga asoslangan davlatlararo muloqotni tiklashga tayyor ekanliklarini tasdiqladilar. Rossiya-Amerika oliy darajadagi uchrashuvini tayyorlashni o‘z ichiga olgan muntazam aloqalarni davom ettirish yuzasidan kelishuvga erishildi.