Toshkent, O‘zbekiston (UzDaily.uz) — 29 noyabr kuni Uchtepa tumani jinoyat ishlari bo‘yicha sudida mashhur vayner Farhod Mannopov (Mittivine)ning o‘limi bilan bog‘liq ish ko‘rib chiqildi.

Sudlanuvchilar sifatida Toshkentdagi xususiy Star Med Center klinikasining otorinolaringolog shifokori va anesteziolog-reanimatologi ishtirok etdi.

Eslatib o‘tamiz, 27 yoshli Farhod Mannopov basseyn chetiga boshi bilan urilib, jarohatlangan. U ushbu klinikaga murojaat qilgan va unga jarrohlik amaliyoti o‘tkazilgan. Biroq, narkoz qo‘llanilgandan keyin bemor komaga tushib qolgan va undan chiqmagan.

Oliy sud ma’lumotiga ko‘ra, sudlanuvchilar O‘zbekiston Respublikasi Jinoyat kodeksining 117-moddasi (xavfda qoldirish) bo‘yicha oqlangan.

Shu bilan birga, ular o‘z kasbiy majburiyatlarini lozim darajada bajarmaganlikda (Jinoyat kodeksining 116-moddasi) aybdor deb topilgan.

Birinchi ayblanuvchiga besh yillik ozodlikni cheklash jazosi va ikki yil davomida tibbiy faoliyat bilan shug‘ullanish huquqidan mahrum qilish hukmi chiqarildi.

Ikkinchi ayblanuvchiga uch yil va olti oylik ozodlikni cheklash jazosi berildi, shuningdek, uning ikki yil davomida anesteziolog-reanimatolog sifatida ishlash huquqi cheklandi.