Toshkent, O‘zbekiston (UzDaily.uz) — Angliyaning «Manchester Siti» futbol klubi himoyachi Abduqodir Husanovni rivojlantirish maqsadida ijaraga berishga qaror qildi. Bu haqda Thehardtackle nashri xabar bermoqda.

Maʼlum qilinishicha, klub rahbariyati yosh futbolchiga muntazam o‘yin amaliyoti berish orqali uning salohiyatini rivojlantirishni maqsad qilgan. Husanov jamoa talablariga moslashishga muvaffaq bo‘lgan bo‘lsa-da, jamoadagi kuchli raqobat uning maydonda o‘zini ko‘rsatish imkoniyatini chekladi.

Hozirga qadar u “Siti” safida to‘qqizta uchrashuvda ishtirok etgan va so‘nggi besh uchrashuvda zaxirada qolgan. Shu sababdan murabbiylar shtabi uni vaqtincha ijaraga berish orqali uning o‘yin amaliyotini taʼminlashga qaror qilgan.

Shu bilan birga, klub Husanovni uzoq muddatli strategiyaning muhim qismi sifatida ko‘rishda davom etmoqda va uni to‘liq tark etish niyatida emas.

Maʼlumotlarga ko‘ra, yosh himoyachiga Angliya Premyer-ligasining bir qator klublari va Yevropaning yetakchi chempionatlaridan qiziqish bildirilmoqda. Ular Husanovni o‘z jamoalarining asosiy o‘yinchisi sifatida ko‘rishmoqda.