Toshkent, O‘zbekiston (UzDaily.uz) — O'zbekiston elchisi Alisher Abdusalomov Koreya Respublikasi kichik va o'rta biznes federatsiyasi raisi Kim Ki-mun bilan uchrashuv o'tkazdi, deb xabar qilmoqda "Dunyo" AA muxbiri.

Suhbat chog'ida Kim Ki-mun so'ngi yillarda mamlakatimizda amalga oshirilayotgan o'zgarishlarni yuqori baholab, yaratilayotgan qulay investitsiya muhiti va biznes yuritishning osonlashgani xorijiy investorlarda, shu jumladan, Koreya kompaniyalarida katta qiziqish uyg'otayotganini ta'kidlab o'tdi.

Muloqot davomida mamlakatlarimiz o'rtasidagi savdo-iqtisodiy va investitsiyaviy hamkorlikni yangi bosqichga olib chiqish hamda o'zaro manfaatli loyihalarni amalga oshirish, hududlararo hamkorlikni rivojlantirish orqali ikki tomon ishbilarmonlari o'rtasidagi aloqalarni mustahkamlashga alohida e'tibor qaratish lozimligi qayd etildi.

Shu o'rinda, to'rtinchi Toshkent xalqaro investitsiya forumida qatnashish hamda ikki mamlakat ishbilarmonlari ishtirokida O'zbekiston – Koreya Respublikasi biznes-forumini o'tkazish maqsadida federatsiya raisi boshchiligidagi Janubiy Koreya tadbirkorlaridan iborat delegatsiyaning iyun oyida O'zbekistonga tashrifini amalga oshirish masalasi alohida muhokama qilindi.

Uchrashuv yakunida, mazkur federatsiya bilan hamkorlikda O'zbekistonda amalga oshirilishi ko'zda tutilgan istiqbolli investitsiya loyiha takliflarini Janubiy Koreyaning kichik va o'rta biznes vakillari orasida targ'ibot qilish bo'yicha olib borilayotgan ishlarni faollashtirish yuzasidan kelishib olindi.