Toshkent, O‘zbekiston (UzDaily.uz) — Janubiy Koreyaning «MAXUM Co.LTD», «EZENNA Co.LTD», «Mirae Cell Farm Co.LTD» va «COSBALL Co. LTD» kompaniyalari vakillaridan iborat delegatsiya 5-8-yanvar kunlari amaliy tashrif bilan Qashqadaryo viloyatida bo'ldi, deb xabar bermoqda "Dunyo" AA muxbiri.

Tashrif davomida Janubiy Koreya kompaniyalari rahbarlari Qarshi shahar hokimi Normo'min Xolboyev bilan muzokaralar o'tkazdi. Muloqot chog'ida o'zaro aloqalarini yo'lga qo'yish, xususan, hamkorlikda tibbiyot, sanoat va uy xo'jaliklari uchun rezina qo'lqoplar, kosmetika mahsulotlari ishlab chiqarish masalalari muhokama qilindi.

Janubiy Koreyalik tadbirkorlar o'z mahsulotlari va loyihalarini taqdim etib, Qarshi shahrida ishlab chiqarishni tashkil qilishga qiziqish bildirdi. Shahar hokimi mazkur loyihalarni amalga oshirish uchun barcha zarur yordam ko'rsatishga tayyor ekanligini ta'kidladi.

Uchrashuv yakunida tomonlar hamkorlikni rivojlantirish va amaliy ishlarni boshlash bo'yicha muhim kelishuvlarga erishdilar.

Tashrif davomida delegatsiya a'zolari Qarshi shahridagi qator obyektlarga tashrif buyurdi. Jumladan, "Qavali" va "Buyuk Turon" kichik sanoat zonalari, "Sulton Tex Group" klasteri, "Hyuper Trade" kompaniyasi hamda ko'p tarmoqli "Brosmed" va "Javohir Medical" xususiy klinikalar faoliyati bilan tanishib, o'zaro hamkorlik masalalarini muhokama qildi va dastlabki kelishuvlarga erishdilar.

Janubiy Koreyalik tadbirkorlar hududning infratuzilmasi va imkoniyatlarini yuqori baholab, istiqbolli loyihalarni amalga oshirishga qiziqish bildirdilar.

Tashrif yakunida ikki mamlakat tadbirkorlari o'rtasida hamkorlikni mustahkamlash, investitsiyalarni jalb qilish va qo'shma loyihalarni amalga oshirish bo'yicha kelishuvlar imzolandi.